Nalětny wulět Komorowčenow Při  rjanym nalětnym wjedrje poda so Domowinska skupina Komorow;Trupin, Rakecy  na lětuši wulět z awtami, kiž wjedźeše sobotu, dnja 5. meje 2012, wokoło Dubrjeńskeho bahna. Wot Dubrjeńka so podachu z kuču na puć, zo bychu takle zeznali Dubrjeńske bahno.Spominachu  w tutym zwisku na posmertne narodniny Jana Lajnerta, serbskeho wučerja, basnika a spisowaćela,  kotryž je so 22.Meje před  120 lětami w Rakecach narodźił. Wón běše jara zwjazany z přirodu a wuda 1954 knihu z Serbskimi rostlinskimi mjenami.Přewjele rostlinow w bahnu wšako hišće njekćějachu.Ale krasne běłe kćenja   bahnjenca (Sumpfporst) móžachu  wobdźiwać. Bahnjenc je w Serbach wuznamna rostlina.Suche zelo zašiwachu žony do  mĕška a kładźechu do kamora , jako škit drastow a płatow před mólemi.(Motten).Po wobjedźe w hosćensu "Dubringer Moor" w Dubrjeńku, hdźež móžachu sebsce skazać a bjesadować z serbskim korčmarjom, dźěše jězba dale do Ćisowa(Zeißholz) hdźež wobhladachu sej jedyn z najstarskich serbskich  historiskich statokow(Dreiseitenhof), dźensniši wjesny muzej.Nimo stareho domskeho, hdźež taflička powita z "Witajće k nam" a domska potrěba kaž tež dokumentacija wo Serbach so pokaza,wustaji so w hrodźi a dalšich rumnosćach wosebitosć  Ćisowa.
Je to něhdyše Serbske burske hórnistwo a wuwiće wotwara wuhla a produkcija briketow  wot  lěta 1848  hač do 1992 .Graty, mašiny, wobrazy a dokumenty zeznajomnichu z wotrězkom stawiznow našeje Serbskeje domizny.Z šalku dobreho kofeja w Nowej wsy pola Kulowa w Grofic hosćencu  so zakonči  zajimały a powučacy dźeń.

Přednošk  "Peru, kraj (nic jenož) Inkow" z Janku Pěčkec de Lévano a Yuriom Nguyen Lévano García w Komorowa dnja 24.02.2012 .
Knjez Lévano  powědaše wo stawiznach, turistiskich zajimawostkach, politiskej situaciji a druhich zjawach w swojim kraju.  

 

Přednošk wo namjeznych kamjenjach saksko-pruskeje hranicy z lěta 1815, kotryž měješe Hans-Joachim Gawor  dnja 7. oktobra 2011, 19 hodź w młodłzinskim klubje w Komorowje

knižna premjera Serbskeje protyki 2012
wutoru, dnja 27. septembra 2011, w 17.00 hodź.w gmejnskej bibliotece w Rakecach  Běše to zhromadne zarjadowanje Ludoweho nakładnistwa Domowina a Domowinskeje skupiny Komorow/Trupin/Rakecy.

Z noweje protyki 2012, kotraž so hłownje zaběraše z wjesnymi dźělami Rakečanskeje gmejny,  čitachu Alenka Hagerowa, Pětr Felfa a Siegfried Schelzig.

Při poměrnje rjanym wjedrje zetka so někak 20 čłonow a wjesnjanow  na Komorowskim sportnišću.Komorowska "hutowa -młodźina" wšako tam ma swój domicil a nam jón přewosta za tutón hižo tradicionalny "zahrodowy swjedźeń".

Rozmołwa ze serbskim skótnym lěkarjom a rozhłósownikom

Marko Grojlich z Bukec bě dnja 13. meje 2011 naš hósć. Wón powědaše nam zajimawe stawizny ze swojeho powołanskeho skutkowanja jako skótny lěkar a wosebje jako rozhłósownik. Mjez druhim bě wón 1998 – tehdy hižo 88-lětnu - dźowku poslednjeje (serbskeje) zaprajerki z Wulkich Ždźarow zeznał; ju a jeje mać tež mnozy přitomni znajachu. Nic jenož rěč, ale tež zamóžnosć zaprajenja a wjele wědy stej sobu do rowa wzałoj. Naša mać bě cyle zahorjena, jej je so tuta bjesada ze serbskim skótnym lěkarjom jara lubiła, tež podpisanej.

Do zarjadowanja bě so skupinske předsydstwo zešło, zo bychu so nadawki zrjadowali resp.wobkrućili a naš lětny plan precizował.

Přednošk prawiznicy          8.4.2011

Čłonka našeje skupiny Andreja Langnerowa přednošowaše nam na derje wopytanym wječorku –20 ludźi bě přichwatało - wo prawniskich prašenjach, wosebje wo postajenju pacienta a prewentiwnym postajenju. To bě jara zajimawy přednošk, wšako to kóždeho na někajke wašnje nastupa. Tak bě po hodźinskim přednošku hišće tójšto diskusije. A na kóncu pokaza nam knjeni Langnerowa hišće krasne fota wo jeje a druhich dźěćoch w serbskich narodnych drastach w Rakečanskej pěstowarni.

Serbske dźiwadło

Bohužel jenož pjećo z Komorowa a Rakec wopyta dnja 12. měrca 2011 w Budyšinje premjeru struchłohry „Zasypane” awstriskeho awtora w serbskim přełožku. Předstaji so komplikowana, swójbna situacija (syn je při njezbožu wo žiwjenje přišoł, wowka je dementna a staršej chcetaj so dźělić dać). Po měnjenju podpisaneje přewjele rjejenja a nic dosć diferencowane, škoda. B. F

Naša hłowna a wólbna zhromadźizna

Dnja 3. februara 2011 zetkachmy so w Šimanec korčmje k našej skupinskej hłownej a wólbnej zhromadźiznje z kofejpićom. 13 čłonow so wobdźěli. Wosebje zwjeselace je, zo móžachmy na tutym dnju dwěju noweju čłonow přiwzać: Wolfganga Hagera z Komorowa a dr. Güntera Holdera z Rakec, kiž bě so tež na Komorowskim kursu serbšćiny wobdźělił. Naša čłonka Andreja Langnerowa z jeje dźowku Marthu kaž tež z wnučku korčmarki za nas lubozny ptačowasny program z wjacorymi spěwami (wosebje serbskimi) a rejkami wuhotowaše, za to słuša jej wosebity dźak.

Skupinska předsydka B. Felberowa poda rozprawu wo našim wobstajnym dźěle, kiž so wot přitomnych schwali. Potom nawjedowaše prof. dr. Helmut Faska wólby. Wone běchu wosebje tohodla trěbne, dokelž naša doĺholětna kasěrarka Hedwig Lehmannowa wjace za tute zastojnstwo k dispoziciji njesteješe. Prof. Faska dźakowaše so dotalnemu předsydstwu za wobstajnje dźěło: Angelice Müselerowej, Alence Hagerowej, Andreji Grósowej, Marce Elinej, Hedwig Lehmannowej a Borborje Felberowej.Do noweho předsydstwa wuzwolichmy sej Dietmara Heusera (jako kasěrarja), Alenku Hagerowu (kiž wukonja zjawnostne dźěło a našu internetnu stronu wuhotuje), Angeliku Müselerowu, Andreju Grósowu z Rakec a jako předsydku znowa B. Felberowu. Wot předsydstwa namjetowany dźěłowy plan so schwali. B. F.

Na Ptačim kwasu

Dnja 21. januara 2011 wobdźělichmy so šešćo na Ptačim kwasu w Kulowje, hdźež wuměłcy Serbskeho ludoweho ansambla štyri serbske kwasy pokazachu: katolskeho wokoło Kulowa, Budyskeho ewangelskeho, Blunjanskeho a delnjoserbskeho kwasa. Znate stučki, drasty a reje běchu wosebje za tych, kiž to lědma znajachu, jara rjane, tola tež podpisanym so folkorny program jara lubješe. Po programje zapiskaše kapała Come back a rejowachmy hač do srjedź nocy. K dobrej naladźe zawěsće tež přinošowaše, zo běchu blida běłe kryte a so posłužowaše, tak zo bě cyła atmosfera we wjacezaměrowej hali přijomniša hač zašłe lěta. B. F.

Dwaceći zajimcow je so zašłu sobotu na tradicionalnym wulěće našeje Domowinskeje skupiny Komorow/Trupin wobdźěliło. Při rjanym pózdnjolětnim wjedrje dojědźechmy sej z awtami najprjedy do Wěteńcy. W tamnišej Starej hospodźe nas Cornelia Bjedrichowa hižo wočakowaše. W historisce wuhotowanej korčmarskej stwě dachmy sej kofej a słódny tykanc słodźeć. Hawštyn Smoła rozprawješe nam wo swojich nadawkach jako serbski braška a što je w 30 lětach swojeho skutkowanja w tutym čestnym zastojnstwje wšitko dožiwił. Powědaše nam tež tón abo tamny žort a wězo smy sej k tomu zaspěwali. Dalša stacija běchu Njebjelčicy,
hdźež nam Jurij Hanski zajimawostki wsy pokaza. Tak zhonichmy, kak běchu Njebjelčicy w lěće 2008 Europske myto za cyłotne a trajne wuwiće a ponowjenje wsy z wuběrnej kwalitu dóstali. Tež eksponaty mjezynarodnych dźěłarničkow sej z wulkim zajimom wobhladachmy. Swój wulět skónčichmy ze zhromadnym wobjedom w Pančičanskej Starej hospodźe. Tekst a foto: A. Hagerowa

SN 08.09.2010

Galerija

Komorow (hako/SN). Swjatkownu sobotu bě Komorowska Domowinska skupina swojich čłonow na zarjadowanje w přirodźe přeprosyła. Nimale 20 zajimcow wobdźěli so na pućowanju po haćenjach wokoło Komorowskich hatow.Rakečanski rybar Norbert Langner rozprawješe wo zajimawostkach stawiznow a přitomnosće Komorowskich hatow. Wón pokaza skupinarjam něhdźe tři tydźenje stary karpy a rozjasnjowaše, kak so wone pod wobkedźbowanjom přirodoškita dale wuwiwaja. Alenka  Hagerowa powědaše wo najwšelakorišich rostlinach, zelach a hribach. Tak skedźbni wona na kćějate rězne trawy we wodźe a na brjohach hatow, na dźiwje lilije a na dróstnicu (Laichkraut), na žaby a ptački a jich koncert kaž tež na krasnje wonjacu a kćějatu wjerjebinu. Na starych brězach wuhladachu wulětnicy hriby, z kotrychž su w starych časach žahow dźěłali.Tež hojenske zela kaž běłe a čerwjene cycawki (Taubnessel), dźiwje róže a wšelake ćernjowki Alenka Hagerowa rozłožowaše. Poponc (Gundermann) je na haćenjach jara rozšěrjeny. Komorowčanka wujasni, kak móžeš tutu rjanu rostlinu wužiwać jako čaj, tinkturu abo jako nalětnju solotej. Wona je jara strowa a pomha, jeli sy nazymnjeny abo maš ćeže z požiwanjom. Komorowske haty, kotrež maja wšitke serbske mjena, njejsu jenož nalěto wopyta hódne, ale přez cyłe lěto. Bě to wokřewjace a powučne Domowinske zarjadowanje w přirodźe.

Sn 26.05.2010

Galerija

dalše wobrazy

Wotkrywa schowane rjanosće

Rakecy (aha/SN). Njewšědnu wustajeńcu je minjeny pjatk předsydka Rakečanskeho stawizniskeho
towarstwa RAK Annemarie Rentsch w tamnišim młodźinskim a towarstwowym domje wotewrěła.
Diplomowa agrarna inženjerka za skótnu produkciju Alenka Hagerowa je zašłe tři lěta we
wokolinje Rakec a Komorowa na temu „Poezija w přirodźe“ jónkrótne motiwy rostlin zapopadowała.
Alenka Hagerowa předstaja na 62 fotach a třoch mólbach z wóskowymi barbami małe, njenahladne rostliny,
kotrež su při dokładnym wobkedźbowanju w swojej rjanosći „dušu wokřewjace.
Hdyž so po přirodźe wuchodźuješ, maš so z woběmaj wóčkomaj rozhladować, zo by wšu
rjanosć stwórby wuhladał“, Hagerowa swój zajim za dźiwje rostliny wopodstatni. Ze swojimi fotami pak
chcewona tež na pisane barby hribow pokazać. Wone su wosebje w zymje jarazajimawe. Wšitke motiwy rostlin z wuwzaćom hribow su trojorěčnje – němsce,serbsce a łaćonsce – pomjenowane. Taknańdźeš tam lišawy runje tak kaž brusnicu, rólnu křipicu, łučny hwězdnik,jemjelinu, zaječi dźećel a wjele dalšich.Wopytowarjo wotewrjenskeho zarjadowanja z připóznawacymi słowami njelutowachu. Mjez nimi bě wulka ličba Serbow. Čłonojo Domowinskeje skupiny Komorow-Trupin-Rakecy běchu ze swojej předsydku Borboru Felberowej wosebje rady přeprošenje na zarjadowanje sćěhowali, wšako je Alenka Hagerowa čłonka skupinskeho předsydstwa. Wo zajimawej přehladce praji Annemarie Simonowa z Trupina: „Wysoko připóznać ma so kwalita fotow, kotrež nam rjanosće našeje njeposrědnjeje přirody tak přeswědčiwje zbližeja. Zdobom mam to tež za napominanje, so za to zasadźować, zo by so nam přiroda w swojej rjanosći we wšěch móličkich detailach zdźeržała.“

Sn 22.03.2010

Komorow pola Rakec. Domowinska skupina Komorow přewjedźeše sobotu,13.02.2010 swoju hłownu a wólbnu zhromadźiznu. Jako prěnje přiwzachu dweju noweju čłonow, tak zo maja nětko 17 sobustawow w Komorowje, Trupinje a Rakecach. Skupina chce so zajimcam z druhich wsow gmejny dale wotewrić.

Loni je Domowinska skupina 9 zarjadowanjow organizowała. Wjele zajima budźachu mjez druhim zelowy wječork, tradicionalny lěćny swjedźeń a wulět z awtami do Čorneho Chołmca, hdźež wobhladachu sej hornčernju, cyrkej a w Krabatowym młynje zajimawy přednošk Gertrud Wincarjoweje słyšachu. 27 ludźi wopyta hodowničku, kotruž 8 šulerjow serbšćiny z Rakec kulturnje wobrubi. Nimo toho přewjedźechu w zašłymaj lětomaj w Komorowje 4 kursy serbšćiny za dorostłych pod nawodom wučerja Jurja Šołty; to bě 60 wječornych zarjadowanjow za stajnje 5 do 8 wobdźělnikow.

Do lětušich předewzaćow, kiž Domowinska skupina sobotu wobzamkny, słuša wopyt wotewrjenja fotoweje wustajeńcy Alenki Hageroweje w Rakecach, wopyt serbskeho dziwadłoweho předstajenja w Budyšinje a podpěra Zakładneje šule ”Bjarnat Krawc” Rakecy při přewjedźenju projekta na česć serbskeho komponista. W lěću chcedźa so na wuprawu do Wěteńcy, Njebjelčic kaž tež Lessingoweho muzeja w Kamjencu podać. Čłonka skupiny Alenka Hagerowa wupraji so zwólniwa, internetnu stronu skupiny zhotowić. Nowemu předsydstwu přisłuša 6 čłonow, jako předsydka bu znowa Borbora Felberowa wuzwolena. Fel.

Komorow (AlH/SN). Čłonojo Komorowskeje Domowinskeje skupiny zetkachu so njedawno pola Elic k swojej adwentničce. Wona je kóžde lěto zakónčenje skupinskeho dźěła a zdobom jedyn z jeho wjerškow. Wučerka Rakečanskeje zakładneje šule Simone Bergmannowa bě ze serbšćinu wuknjacymi
dźěćimi program serbskich a mjezynarodnych pěsnjow a basnjow nazwučowała.
Wosom šulerjow 4. lětnika jón na adwentničce předstaji. Swoje spěwy holcy a hólcy sami na
pišćałce a gitarje přewodźachu. Samo někotre serbske reje woni skupinarjam pokazachu, štož wšak bě we wuskej rumnosći trochu ćežko. Andrea Langnerowa a jeje dźowce zahorichu z hudźbu a spěwanjom.
Třilětna Elisabet při serbskej pěsni pilnje sobu spěwaše. Marta ze 4. lětnika wopytuje Wojerowsku
hudźbnu šulu a pokaza swoje kmanosće na huslach, při čimž ju mać na pišćałce přewodźeše. Na
kóncu přepodachu dźěći skupinarjam samopaslene hwězdy.Na to dachu sej Komorowčenjo kwasnu poliwku a chrěn z howjazym mjasom słodźeć.
SN 10.12.2009